ក្លិប Real Madrid បានបញ្ជាក់កាលពីម្សិលមិញថា Gareth Bale មានបញ្ហារបួសសាច់ដុំនៅកំភួនជើងឆ្វេង ហើយតារាឆ្នើមដែលគេរំពឹងថា នឹងអាចចូលប្រកួតបានវិញនៅចុងសប្ដាហ៍នេះ គឺមិនអាចលេងបានឡើយ ពោលគឺរូបគេត្រូវសម្រាកព្យាបាលយ៉ាងតិចកន្លះខែឯណោះ។
Bale បានរងរបួសអំឡុងប្រកួត UEFA Champions League ដែល Real ឈ្នះ Shakhtar Donetsk ៤-០ កាលពីយប់ថ្ងៃអង្គារ និងបានពិនិត្យនៅទីក្រុង Madrid ប្រទេសអេស្ប៉ាញ កាលពីថ្ងៃព្រហស្បតិ៍ម្សិលមិញ។
Real បានចេញសេចក្ដីថ្លែងការណ៍យប់មិញថា៖ “បន្ទាប់ពីពិនិត្យរបួសរបស់ Bale នៅ Sanitas La Moraleja University Hospital ថ្ងៃនេះ ឃើញថាកីឡាកររបស់យើង បានរងរបួសសាច់ដុំនៅកំភួនជើងឆ្វេង។ ស្ថានភាពរបស់គាត់ នឹងត្រូវវាយតម្លៃតាមក្រោយ”។
ស្របពេលដែល James Rodriguez ពុំទាន់ជាសះស្បើយនៅឡើយ ហើយកីឡាករវ័យ២៦ឆ្នាំ Bale របួសថែមទៀត នេះអាចជាកង្វល់មួយសម្រាប់អ្នកចាត់ការ Rafa Benitez ប៉ុន្តែយ៉ាងណាគេជឿថា Isco នឹងអាចរ៉ាប់រងតំណែងខ្សែបម្រើលេខ១០ (Role No. 10) នេះបាន៕
0 comments:
Post a Comment