គ្រូបង្វឹកស្វាយរៀងថា ទម្រង់លេងក្រុមស្វាយរៀងបានធ្លាក់ចុះមកពីបញ្ហាកីឡាកររបួសច្រើន និងទីលានស្មៅសិប្បនិមិត្ត ស្របពេលគ្រូបង្គោលអគ្គស្នងការដ្ឋាននគរបាលជាតិ(ប៉ូលិស)ថា មួយរយៈចុងក្រោយនេះក្រុមរបស់លោកមានបញ្ហាផ្ទៃក្នុង។ ការលើកឡើងនេះ បន្ទាប់ពីក្រុមទាំងពីរធ្វើបានត្រឹមស្មើ១-១ កាលពីយប់ម្សិលមិញនៅពហុកីឡដ្ឋានជាតិ សម្រាប់ការប្រកួតបាល់ទាត់លីកលំដាប់ទី ១របស់កម្ពុជាសប្ដាហ៍ទី ១៦។
លោក សំ វ៉ាន់ដេត
លោក សំ វ៉ាន់ដេត គ្រូស្វាយរៀងបានឲ្យដឹងថា ទម្រង់លេងកូនក្រុមលោកមានការធ្លាក់ចុះមកពីមួយរយៈមុនកីឡាករមានរបួសច្រើននាក់ទាំង ប្រាក់ មុន្នីឧត្ដម ផានី អីរដ្ឋា ហូយ ផល្លិន ជាដើម។ ពេលនេះពួកគេលេងមិនទាន់បានស៊ីចង្វាក់គ្នាល្អឡើយ ដោយសារពេលរបួសកីឡាករសម្រាកច្រើន ហើយមិនបានហ្វឹកហាត់ជាមួយគ្នាពេញលេញល្អ។
លោកបានបន្ថែមថា ម៉្យាងទៀតក៏អាចមកពីបញ្ហាទីលានដែលក្រុមរបស់លោកធ្លាប់លេងលើស្មៅធម្មជាតិរបស់ខ្លួន។ លេងលើស្មៅសិប្បនិមិត្តវាអាចនាំឲ្យកីឡាករឆាប់អស់កម្លាំង និងមានរបួស ហើយស្មៅសិប្បនិមិត្តក៏អាចធ្វើឲ្យមានការរាំងស្ទះក្នុងការបញ្ជូនបាល់ឲ្យដៃគូផងដែរ។
ចំណែកលោក អ៊ុង កនយ៉ានិត គ្រូក្លិបប៉ូលិសវិញបានឲ្យដឹងថា កូនក្រុមរបស់លោកកំពុងមានបញ្ហាផ្ទៃក្នុងមិនអាចប្រាប់បាន ដែលនាំឲ្យទម្រង់លេងមានការធ្លាក់ចុះមួយរយៈចុងក្រោយនេះ។ ជាការពិតនៅពេលដែលប៉ះក្រុមខ្លាំងមួយ លោកតែងប្រើទម្រង់ការពារត្រៀមវាយបក ប៉ុន្តែទម្រង់នេះទាមទារឲ្យកីឡាករមានចលនាលឿន ពេលបានបាល់សម្រុកឡើងទៅតំបន់ប្រយុទ្ធលឿនបំផុតតាមដែលអាចធ្វើទៅបាន ប៉ុន្តែពួកគេធ្វើមិនបានល្អដោយសារលេងមិនយល់ចិត្តគ្នា។
លោក អ៊ុង កនយ៉ានិត
គ្រូបង្គោលរូបនេះបញ្ជាក់ថា របួសកីឡាករជារឿងសំខាន់ផងដែរ ដោយសារក្រុមលោកមានធនធានកីឡាករមិនគ្រប់គ្រាន់ ដែលពេលនេះកំពុងរកអ្នកជួយឧបត្ថម្ភបន្ថែម ដើម្បីអាចស្វែងរកកីឡាករថ្មីល្អៗ មកបំពេញចំណុចខ្វះខាត។ ទោះបីជាយ៉ាងណាប្រកួតក្រោយៗ លោកនឹងប្រឹងប្រែងកែប្រែស្ថានការណ៍បញ្ហាទាំងឡាយឲ្យល្អមកវិញ ដើម្បីឲ្យក្រុមមានទម្រង់លេងកាន់តែប្រសើរឡើង។
ប្រកួតសប្ដាហ៍ទី ១៧ ក្រុមខេត្តស្វាយរៀងទទួលក្រុមខ្លាំងបឹងកេតអង្គរនៅទីលានរបស់ស្វាយរៀង។ ចំណែកអគ្គស្នងការដ្ឋាននគរបាលជាតិប៉ះ ណាហ្កាវើល នៅពហុកីឡដ្ឋានជាតិ៕
0 comments:
Post a Comment